انا متلغبطة اوى

بصى يا ستى
انا هجيبلك من الاخر
لان بصراحه اللى قبلى قال المفيد
واظن انك مش محتاجه ليا
بس برده لازم تتأكدى وتعرفى
الردين اللى قبلى شبه متفقين فى اللى انا اقوله
صراحه احمد ومى جابوا النهايه

المهم
اولا:
انتى بتقولى انك بتحبى صاحب اخوكى
بس حب من طرف واحد
طيب انتى اتأكدتى من ده ازاى..؟؟

ثانيا:
بتقولى برده ان انتى حبيتى انسان تانى من على النت
وجالك الاحساس ده بعد ما هو صارحك بالحقيقه
كلام برده تمام

بصى بقى يا ستى
انا استنتجت من كلامك ده
ان اللى عندك ده مش حب حقيقى ومش حب بمعنى الكلمه
لان الحب الحقيقى مش مشاعر ولهفه وشوف وحنين وبس
لاء الحب طاقه وانتاج وعمل وجهد واخلاص

ده مجرد اعجاب بس مش اكتر ويمكن يكون حب بالنسبه للاولانى
بس عمره ما يكون حب بالنسبه لبتاع النت
ولو فكرتى معايا شويه
هتلاقى ان كلامى صح لان لو انتى فعلا حبيتى الاولانى لا يمكن تحبى حد غيره
انما اللى حصل ان انتى بسبب فقدان الامل بالنسبه للاولانى اللى هو صاحب اخوكى
من الطبيعى ان اى حد يقولك بحبك تتعلقى بيه على طول
وده مش حب ده مجرد اعجاب بالشخصيه
زى بالظبط لما يكون حد بيغرق وما بيصدق حد تانى يمدله ايده
علشان يجبه ويطلعه من الميه وينجيه من الغرق والمشكله اللى هو فيها
ده هو اللى حصل معاكى بالنسبه للتانى

وفكرى شويه مع نفسك هتلاقى كلامى صح

طيب كلام كويس
نيجى بقى لنقطه مهمه جدا فى الموضوع

لو افطردنا مثلا
ان التانى ده فعلا هو بيحبك
صعب جدا الارتباط بيه صدقينى
انتى متعرفيش الانسان ده على حقيقته
يمكن يكون على النت شخصيه مفيش زيها اتنين وميختلفش عليها حد
وفى الحقيقه يبقى انسان تانى خالص

وده الموضوع من وجهه نظرى بالنبه للتانى

نيجى بقى للاولانى صاحب اخوكى
ده لو انتى فعلا بتحبيه يبقى عمرك ما هتفكرى فى اى حد تانى
مهما حصل الا اذا هو قالك بنفسه انه مبيفكرش فى الارتباط او شئ يبقى
بالنسبالك شبه مستحيل فى انك ترطبتى بيه
ولو كنتى فعلا بتحبيه زى ما قولتلك مش هتحبى التانى خالص

حلى لمشكلتك بأختصار هو اما انك تصارحى اخوكى وتخليه يحاول يعرف الموضوع
ويكون عندك الشجاعه الكافيه لده
او اما انك تحاولى تلمحيله او تفهميه بطريقه او بأخرى انك معجبه بيه او بتحبيه

او اما انك تشيلى الموضوع ده من دماغ وتحاولى انك تنسيه
مع انى عارف ان ده هيبقى صعب عليكى
بس هو ده اللى المفروض يحصل
والحل فى ايدك
والمهم فى الموضوع كله
هو التفكير الصح والسليم
وفكرى فى كلامنا ده كويس

ويارب مكنش طولت عليكى
ويارب اكون فدتك فى موضوعك

تقبلى فائق احترامى وتقديرى
مصطفى الجنرال