هل فعلا البنات كائنات تافهة و هايفة و دماغها فاضية؟

مش عارفة ليه الكل فاكر ان المجتمع البناتى

مجتمع تافه وهايف ودماغة فاضية !!!

اعتقاد
أن البنات ما وراهاش حاجة غير الكلام فى الموضة وتسريحات الشعر والماكياج
و مين عاكسنى ومين بصلى مين هايموت ويكلمنى .. وان فيه جزء منهم بيتوتى
يعنى مالهوش غير فى شغل المطبخ والقعدة أمام التليفزيون وحفظ الاغانى
والافلام.. ومين قال ايه ويقصد ولا مايقصدش .. طبعا أنا مابتكلمش عن
المرأة المصرية لانى عارفة انكم هتقولوا دى واخدة حقها تالت ومتلت وليها
دور فى البرلمان وبقيت وزيرة وعضوة فى الاحزاب وكمان ممكن تخلع وتطلق زى
ماهى عايزة.. لكن أنا بتكلم عن البنت المصرية اللى لسه مشافتش دنيا
المرمطة واللى الكل بيبصلها على انها كائن ضعيف مسالم وممكن يستغل بسهولة
ويسلم برضه بسهولة.. يعنى مش أكتر من انها سمكة ممكن اصطيادها بطعم مناسب
وجذاب.. وبعدين شويها وأكلها بالهنا والشفا " احتمال " بس اللى أكيد ان مش
كل البنات راكدين فى الميه ولو طلعوا منها يموتوا.. فيه بنات كتير عايشين
على الارض وشايفين الدنيا وفاهمين قطارها ماشى ازاى ومحطاته فين .. ودول
بنات ذكية وبتفهم, بيشوفوا من بعيد لبعيد وبيتعلموا من بعيد بدون مايقربوا
للخط الاحمر.. بس للأسف الناس برضه بتبصلهم على انهم متحررين وعارفين اللى
فيها وبتعتبر ذكائهم نوع تانى ممكن يستغل أسوأ استغلال علشان كده تلاقى
الناس بتتعامل مع النوع ده من البنات ببجاحة وبأقصر الطرق وده باعتبار ان
ذكاءهم هايخليهم يمشوا أمورهم.. وفيه بنات بقى بتجيب من الاخر لانهم
عارفين ان مهما عملوا ومهما راحوا موصومين بوصمة انهم بنات فى مجتمع الولد
فيه هو بس اللى من حقه يعمل أى حاجة ويقول اللى هو عايزه من غير ماحد يعلق
, والغريبة ان لسه فيه ناس لحد دلوقتى بتردد جملة " دا ولد وهو حر مفيش
حاجة هاتضره " .
أما البنت فلازم يقفولها على الوحدة ويراقبوا تصرفاتها
وقالت ايه ولمين وكانت واقفة بتتكلم وهى بتضحك ولا وهى مكشرة ده باعتبار
ان البنت لما تضحك أو تبتسم وهى بتتكلم تبقى خرجت عن حدود الادب وتبقى
بترسم وبتعيش الدور.. ولو اتكلمت وهى مكشرة تبقى برضه بترسم دور الادب
والبنت اللى عايشة حياتها جد.. وياما تحت السواهى دواهى وراء التكشيرة دى
أكيد فيه مليون سر وسر.. أما بقى لو البنت هادية بطبعها أو رقيقة يبقى يا
سلام على السهوكة والرسم اللى على تقيل ويبقى هما دول البنات اللى نافعة
واللى بتحاول تمشى أمورها بالصوت الهادى والمياصة والسهوكة.. ايه فى ايه؟!
خلاص خنقتونا لاكده عاجب ولاكده عاجب ساكتين وحشين بنتكلم برضه وحشين..
وفى الاخر هنفضل فى نظر الناس حبة بنات تافهة وهايفة مهما عملنا والحل
الاكيد ان كل بنت تعيش زى ما هى عايزة وميهمهاش أى حد ولا كلام الناس كده
كده بيتكلموا بسبب أو من غير سبب يبقى مفيش فايدة من خوفنا.. ومافيش أحسن
من التنفيض وتكبير الدماغ للكل.. مش احنا بنات هايفة.. أوكى احنا راضيين
بس ماحدش بقى يحاسبنا.. وأهى هيافة بهيافة.. المهم نعيش مبسوطين مش
مقهورين.

زائر

هو مش كل البنات زي بعض
بس فيه بنات فعلا لازم تتحاسب علي كل تصرفاتها لانها طايشه
ميرسي اوي علي الموضوع الجميل ده

ممممممممممم

انا مش عارفه ااقولك ايه البنت المحترمه بتتعرف في اي مكان هي بتقعد فيه بتصرفاتها بسلوكها
بضحكها بمرحها بتكشيرها بحزنها بهزارها
ودي عمر ماحد مايتكلم عليها وكمان يارحاب مذكور في القران الكلام علي الناس المحترمه
اهم حاجه ان البنت اولا تكون محترمه قدام نفسها اولا وطبعا احترامها للمجتمع اللي حوليها
لان البنت زي الجوهرة غاليه ولو رخصت هتبقي مشكله
وسمعتها زي الريشه فمش علي اي حد يتقال عليه مايصه او مسهوكه علي حسب كلامك يعني
الا اذا صدر منه افعال واكيد لو قال كده وهي بنت محترمه اكيد دي هتبقي نفس مريضه لكن لو الاغلبيه قال كده تبقي هي فعلا كده اكيد في ناس محترمه ونقيه من جواها
وكمان المراءه مش وخده حقها هنا بس لا ده في العالم كله بس احنا هنا استخدمناها غلط
وعلي طبيعه الشعب المصري ان الراجل سي سيد وطبعا الرجال قوامون علي النساء
بصراحه مش اتخيل ان بنت تمسك حكم انا ضد الحكايه دي انا دايما اقر واعترف ان البنت ضعيفه
انا عكس كلامك البنت فعلا ضعيفه مش قويه ابدااا وتبقي مليون كدابه وبتضحك علي نفسها اللي بتقول اني بمليون راجل وتبقي رجوله ابدااا ربنا خلقها ضعيفه امال خلق الراجل ليه مش علشان تلاقي هي فيه قوتها والامان معاه وانها محميه براجل
وصدقيني محدش بيقدر يرسم كتير المجتمع بقا واعي مش متخلف وكل واحد عارف مين نفسه ايه وعارف هو بيعمل ايه وعارف مين احسن منه ومين مش احسن منه
موضوع مفهوم تسلمي