مقارنـه بين الطفل الفافي والطفل البيئة

[b]
مقارنـه بين الطفل الفافي والطفل البيئة

الطفــــل الفـــافـــــي

1- الولد من دول يصحى على صوت الكناري اللي في اوضته . . . سو سو سو سو . . .

2- يدخل الحمام ياخد شاور . . . ويغسل شعره بشامبو من إيطاليا . . . ويحط جيل بالموز من فرنسا ويغسل سنانه بمعجون سيجنال تو . . .
- بيتفرج على إلام بي سي كتيـــــــــــــــــــــــر . . .

3- يطلع من الحمام يلاقي الداده مستنياه بفوطه من حريــــــــــــر . . .
وتلاعبه وتهزر معاه بالإنجليزي . . .
- الداده معاها دكتوراه من جامعة باكنجهام في لندن . . .

4- يدخل على اوضته . . . ويفتح الدولاب ويطلع منه هدومه المكويه واللي ريحة اريال باينه فيها . . .
- اريال . . . نسيم الصباح . . .

5- يجيب جزمته من الجزامه . . . اللي مليانه جزم وكوتشيهات . . .
- تقولش دخلت محل لطفي أو توكيل تمبرلاند . . .

6- ينزل يفطر مع مامي ودادي . . . والفطار كورن فليكس بطعم الستروبوري أو الشوكولات . . .
- كورن فيليكس كلووقز . . . مش بسكو مصر . . .

7- يسلم على مامي ويبوسها بعد ماتكون حطتله ديناربوكس بتاعه وفيه
ساندوتشين تشيكن و كيس شيبسي و عصير جهينه أو ايزي موزوو
- ايزي مووزو !! فاكرين الاعلان ده ؟؟؟

8- يسلم على دادي اللي يديله البوكيت موني بالدولار . . . مش يعرفوا
حاجه اسمها جنيه طبعا . . .
جنيه ؟؟؟؟ دي عملة انقرضت من زمااان . . .

9- يطلع من البيت بعد الداده ماتلبسه الشنطه بتاعة الكتب على ضهره . .
بنشوف الشنطه دي مع الخواجات في شرم وبس . . .

10- يركب الباص بتاع السكول . . . ويشاور ( باي باي ) للداده ولمامي
. . . ويركب مع زمايله ويغنوا بالانجليش أو الفرينش . . .
فريدرو جاكو . . . فريدرو جاكو . . . هايللبّووه . . .


الطفــــــل البيئـــــــة

1- ديـــــــــب . . . أخوه رمى عليه طوبة عشان بقاله ساعتين بيصحي فيه . . . وهو ولا هنا . . .
- طبعا .. مقضيها صرمحه في الشارع للفجر. . .

2- العيال دي ماتعرفش اختراع اسمه ( غسيل الوش بعد ما تقوم
من النوم ) . . . هم شوية خناق مع اخواته ويبقى صحصح على الآخر بدل تمارين الصباح ... رياضه برضه . . .

3- طبعا بعد الخناق ده بيبقى جعان . . . تلاقيه بيحوم في الشقه ويدوّر
في المطبخ على أي حاجه . . . انشالله صرصار .. برضه هاياكله من الجوع
- عشان كده ماتلاقيش في بيتهم صراصير . . .

4- بعد ما يحط في بطنه أي حاجه في رغيف . . . يدور على أي حاجه يلبسها . . . القميص مرمي تحت السرير . . . ويقلع أخوه الصغيرالبنطلون بتاعه وهو نايم . . .هدومه كلها مكرمشه . . . تقولوش طالعه من بق *** -

5- طب وبعدين . . . ساعتين بيدور على الجزمه . . . مش عارف رزعها فين . . .
واخوه الكبير خارج من البيت حافي كمان عشان مايقولش انه خدها . . .
افتكر أخيرا انه حاطط فرده منهم فوق الدولاب . . . والتانيه . . . تحت
التلاجه !!!!
- طبعا ما يعرفش اختراع اسمه الشرابات . . .

6- دلوقتي معاد حرب كل يوم . . .
ماما . . . انا عايز مصروفي
مصروف ايه ياااااض . . . انت مش واخد امبارح . . . ولا كل يوم مصروف
مصروف
يعني مافيش اي حاجه ؟؟؟
في دي . . . دييييـــب . . .
ضربة بالحله على نافوخه . . .

7- الباشمهندس الصغير . . . مايعرفش فين كتبه ولا كشاكيله أصلا . . .
عشان كده ... خد أي كتاب موجود في البيت على أي كشكول . . .
مايعرفش يعني إيه قلم . . . غير اللي بياخده على قفاااه . . .

8- هايروح مدرسته ازاي ؟؟؟ طبعا أي ميكروباز أو عربيه نقل وقضيها
شعبطه . . .


في طابور المدرسة . . .

*الطفل الفافي (الهاف لايف) :

1- العيال كلهم واقفين في صفوف شكلها يفرح . . . ده غير ريحتهم اللي زي الفل
- نضافه رباااااااااني . . .

2- الطابور كله تمارين ونشاط . . . على انغام الدي جي ( ياسر شاكر )

3- الاذاعه المدرسية . . . أخبار من مجلات (واشنطون بوست )
- وطبعا .... مافيش ترجمه -

4- يغنوا النشيد الوطني بقيادة المايسترو ( سليم سحاب ) و ( حسن كامي ) . . . كان بيغنيه معاهم قبل ما ربنا يفتح عليه. . .

5- طالعين فصولهم وكأنهم ملايكه أو فراشات . . . وبحماس ونظاااام
تقريبا . . . والله أعلم . . . بيحبو مدرستهم . . . سبحان الله


*الطفــل البيئــــــــة :

1- داخل المدرسه متأخر وحالته نيله اتشعبط في مكروباز ( شبرا ) . . . ومدرسته أصلا في ( الحلمية ) . . .

2- بعد التذنيب والشتيمة من مدرس الألعاب ( حسن أبو شفه ) . . . انضم لباقي زمايله في المعتقل . . . سوري . . . زمايله في المدرسة
ولا واحد منهم فاهم هو فين أصلا . . . واتضح إن صاحبنا أكتر واحد
شيييـــــك فيهم . . .

3- الأثاحه الملثيه . . . ----> تحريف لكلمة ( الإذاعة المدرسية ) . . .
تخيلوا انتو باقي الأخبار بقى . . .

4- النشيد الوطني اللي هم بيقولوه . . . بتاع دوله مجهوله . . . ونفسي
اعرف إيه هي ؟؟؟
طبعا على موسيقى آلات النفخ . . . الشيشة . . .

5- في مرحلة طلوعهم الفصول . . . بيختلط الحابل بالنابل . . .
يا ترى أنا في فصل إيه النهارده ؟؟؟
بعد المدرسة ما تخلص . . . بيرجعوا على بيوتهم بنفس الأسلوب . . .

نشوف يومهم عامل ازاي دلوقتي

*الطفل الفافي (الهاف لايف) :

1- يرجع من السكول تكون الداده في استقباله . . . وتشيل منه الشنطه . . . ويغسل وشه ويغير هدومه . . . والله العظيم . . . وشه انضف من ما كان طالع الصبح أصلا . . .

2- بعد ما غسل وشه . . . الكلمه دي متعوب عليها على فكره . . .
يقعد يلعب بلاي ستيشن لحد ما يعملو الغدا . . .
الغدا بتاعهم بنشوفه في الأفلام الأمركاني . . .

3- هاني ( حبيبى ) . . . دينر از ريدي . . .
السيييــم بتاعهم لما يجهز الغدا . . .

4- بعد الغدا . . . يشرب كبايه ( اورانج جووس ) وينام ساعة عشان يعرف يذاكر ويحل الهووم وورك . . .
مش عارف يعني ايه هوم وورك . . . روح أسال الميس بتاعتك . . .

الطفل البيئــــــــة :

1- أخونا رجع من المعتقل . . . أو المدرسة زي مابيقولوا عليها . . . وهدومه كلها مقطعه وعلامات التعذيب على جسمه . . .
تقولوش جاسوس إسرائيلي أتمسك في حلوان . . .

2- امه لسه ماخلصتش الغدا . . .
النهارده امه دابحه جبنه بيضه . . . واحتمال يكون في فول بالصلصة

3- ترااااادااترااااااااااااااااااااااااا
دي إعلان الحرب . . . أو الغدا < هجووووووووووم > . . .

4- بعد اكلة الفول بالصلصة ومعاه فحلين بصل . . . عادة ما يعقبها إحساس بالضياع . . .
تنااااااااحه . . . فور آيفير . . .
بعد حالة التناحه أو النوم دي . . . بيجي وقت الشده . . .

ياترى الحياه معاهم - الطفل الفافي .. والطفل البيئة - عامله ازاي ؟؟؟؟

*الطفل الفافي (الهاف لايف) :

1- يقوم من النوم على صوت الداده . . . الهادي طبعا . . . عشان يقوم يذاكرمع الميس ( فرانكا ) . . . المدرسة اللي جايبنهاله من إنجلترا
نازله مخصوص . . . بالكتالوج . . .

2- بعد ما يخلص المذاكرة وتحضير دروس تاني يوم . . . مامته تاخده
النادي عشان يلعب رياضه ( باسكت أو تنس ) و احتمال ( سكواش )
مشتركين في نادي المعادي والصيد والشمس . . . ده غير سبورتنج في الصيف

3- يرجع من النادي . . . ياخد دش ويحضر شنطته وينزل يتفرج على شانل تو. . .
شانل تو بتاعة الام بي سي . . . مش بتاعة مصر طبعا . . .

4- على الساعة 10 يقوم عشان ينام . . . والداده تحكيله حكايه قبل النوم . . .
سندريللا وسنوو وايت . . . مش ابو رجل مسلوخه وامنا الغوله . . .

5- ينام على صوت الداده وهي بتغنيله اغنيه رومانسيه . . . وفي حضنه الدبدوب اللي جاله في عيد ميلاده
ملاك نايم يا اخواتي . . .

*الطفل البيئـــــــــة :

1- يفوق من حالة التناحه من الفول والبصل على صوت حد من صحابه . . . عشان ينزل يلعب كوره شراب في الخرابه اللي جنب الحاره بتاعتهم
نفس بدايات إبراهيم سعيد . . .

2- يرجع بيتهم وهو بيجري وهدومه متقطعة ودماغه واخده بتاع تلاتين قلم على سهوه . . . عشان شاط الكوره وكسر القزاز بتاع محل (عم سيد) البقال الراجل ده من كتر القزاز بتاعه ما اتكسر . . . هايفتح مصنع قزاز . . .
3- أخته جابته عشان يحل الواجب ويذاكر . . . بس مامعاهوش قلم . . . قام نزل الشارع عشان يجيب قلم. . . آدي دقني لو جاب ولا حتى رجع من أصله . . .
4- على الساعة 2 الفجر . . . باب بيتهم بيخبط . . . وامه فتحت الباب شافت جارهم دماغه متعوره وجايب لها المحروس اللي كان بيلعب حرب بالطوب وفتح دماغه
تقولش طفل من أطفال الانتفاضه . . .
5- ساب امه وابوه وهم بيصالحو جارهم وبيبوسو ايده عشان ما يعملوش محضر. . . واتسحّب المفعوص على المطبخ جاب حتة جبنه وطماطمايه ورغيف معطن. . . وزوغان على السرير. . .
بسلامته نايم وهو متلفح بالبطانيه زي مايكون من مطاريد الجبل

غدى يوسف

تحفه حلوه مووووووووووووت بس انا وانا فلمدرسه مكنتش زى الولد الفافى يعنى انا كده زى الولد البيئه الله يطمنكو

انا اقدر برده ااقول عليكي كده
انتي عسل والله
ومتشكرة علي ردك ياقمر
ومنوره الصفحه
ومستنيه راي بقيه الاعضاء

ايه الجمال ده
دى حاجه تحفه والله
جمده موووووووووووووووووووت
ربنا يوفقك يا غدى

ويوفقك يامصطفي
ومتشكرة علي ردك الجامد ده
ومنور الموضوع

حلوة

ايه الجمال دا
بجد حلو اوى اوى اوى
تسلم ايديكى

ياجماعه انا بجد متشكرة علي ردودكم العسل دي
الله لايحرمني منك ابدااا
وميرسي ليك يااهلاوي انت ومي

ههههههههههه الحمدلله انها عجبتك

ميرسي ليك كتيير

هههههههههههههههههه
ميرسي ليكي ياقمر بجد منورة الموضوع
كانت مستخبيه ورا الصفحات
فقولت انشطها واوريهالكم
وميرسي ليكووو كلكوووووووووووووووووووو

يخرب عقلك يا غدى

بجد توبيك جااااااامد اوى

تسلم ايداكى يا قمر

والله احلى من النكت ذات نفسها

سلاااااام يا قمر

هههههههههههههههههههههههههههههههههههههههههههههههههههههههههههههههههههههههههههههههههه
جميلة جدا جدا
تسلم ايدكى اللى كتبتها
بجد توبيك جامد موووووووووووز

ميرسي ليكوووووووووووو كتيييييييييير كتييييييييير
بجد انتوا منورين الموضوع
وان شاء الله هتلاقي من ده كتير

انا بقه لا دا ولا دا



اعتبري في المنتصف يعني


شقه وشقه



هههههههههههههههههههههههههه




موضوع جميل بجد امتعتيني

ههههههههههههههههههههههههههه
ايون اكيد
انت مش فافي ولا بيئه
هههههههه والحمدلله اني امتعتك
وميرسي لردك الجميل

نا يا غدى لاده ولاده

ودى كده كده

اخر سنة فى المدرسة ادعو لى


بس يا غدى مفيش مقارنة بين الفافى و البيئة

فى الجامعة