اهم جمل فلبيت المصرى

على مدى سنوات الطفولة و المراهقة يقطع الابن منزل اسرته رايح جاى وهو يستمع للنصائح والتوجيهات نفسها و
التوبيخ نفسه بأساليب وجمل ثابتة لا تتغير .. حتى اصبحنا بمرور الوقت نحفظها جيداً ونتوقعها ..
واسترجاع هذه المقولات " التى لا تسمعها الا فى البيت المصرى " يبعث فى الوجدان قشعريرة ما مصحوبة بالكوميديا
، و يعمق محبة اهالينا فى القلوب ، ويجعلنا نكتشف كم الهستيريا و القلق والمسئولية التى تكبدها الاهالى فى سبيل ان
تقف فخوراً برأى الناس فيك "شكله ابن ناس .. ومتربى "

اشهر 53 جملة بيقولها الاب و الام فى مصر ..


- مش عايزة اسمع صوت ..
وفى هذه الجملة تدريباً مبكراً على تقبل القمع و الديكتاتورية اللذين ستواجهمها طوال حياتك ..

- ماتردش عليا ..
وهى نصيحة اذا التزمت بها ستكسب مديرك فى العمل ..

- تقعد فى اول صف قدام السبورة ...
وهى جملة تعودك على ان تكون فى المقدمة دوماً ..

- لو مش فاهم حاجة ارفع ايدك وقول للاستاذ مش فاهم .. ماتتكسفش ..
فاكرين المدرسين زى اللى على ايامهم زمان ..

- ما تتأخرش بعد المدرسة وتقعد تصيع مع اصحابك ..
وهى نصيحة ستحقق لك قدراً من السعادة الزوجية فيما بعد اذا تعودت على ان تكون رجلاً من الشغل للبيت ..

- اللى بيشيل قربة مخرومة بتخر عليه لوحده ..

- ومالها الكتب بتاعة الوزارة ؟!

- بُص كويس وانت بتعدى الشارع ..

- مافيش مذاكرة على المزيكا .. او .. بتذاكر ازاى والبتاع دة شغال جنبك

- ماتمشيش حافى فى السقعة دى

- صليت العصر ؟!

- ربنا يهديك .. ربنا يهديك ، واحياناً .. انك لا تهدى من احببت

- اطفى التليفزيون وقوم ذاكر ..او .. اطفى التليفزيون وقوم خُش اوضتك

- اوعى تقول لحد هاتلى حاجة

اقفل صدرك

- بلاش وقفة الشبابيك والبلكونات

- كُل على مهلك .. وامضغ كويس .. وماتكلش وانت واقف وكل من قدامك ماتحفش

- كفاية رغى فى التليفونات ..

- ماتقعدش قدام المروحة وانت مستحمى

- المسلسل مش هاينفعك ... قوم

- وانت فاكر احنا مستنين منك حاجة ؟!

- ماتعليش صوتك ..

- بلاش لعب فى الشارع

- يا ابنى اللى ذاكر ذاكر خلاص .. قوم نام

- بلاش لعب بالمقص .. بيجيب الفقر ..

- يابنى كلم خالتك العيانة اسأل عليها

- اوعى حد غريب يديلك حاجة تاكلها ولا تشربها وتاخدها منه

- النوم لحد الضهر بيجيب الفقر

- اوعى تكدب عليا تانى مرة

- لازم تاكل سلطة

- لو شفت خناقة مالكش دعوة بيها

- عيب .. لازم تحترم الاكبر منك

- كلمنا لما توصل

- مالكش دعوة بالسياسة

- بلاش اكل برة

- ماتلبسش القميص على اللحم زى العيال الصايعة

- يا ابنى انت مسطول ولا ايه ؟!

- انت فاكرنا نايمين على ودانا ؟!

- وطى المدعوق دة شوية

- قوم اقرا لك كلمتين ينفعوك

- ايه اللامبالاه و الاستهتار اللى انت عايش فيهم دول

- انت فاكرنا لاقيين الفلوس دى فى الشارع

- والله مانت فالح .. وآدى دقنى اهه ..

- ماتتكلمش بصوت عالى فى الحمام

- ما تنامش غير لما تغسل سنانك

- ماتلزقش فى التليفزيون كدة .. نظرك هيضيع

- ضرب امثلة تشجع على الكفاح واشهرها " احد الاقارب اللى كان بيذاكر على لمبة جاز او على نور العامود فى الشارع ونجح وخد الدكتوراه وسافر امريكا "

- سّلم على عمك كويس يا ولد

- يابنى ماحدش بينفع حد

- ما تطلعش ايدك من شباك العريبة

- قصة الغريق الكاذب اللى كل مرة يقول الحقونى .. لحد ما غرق بجد

- التهديدات المخيفة شكلاً والكارتونية مضموناً .. مثل :
هاقطم رقبتك او هاقطع ايدك او هاقطعلك لسانك .. او هادبحك دبح

- ربنا يرزقك بعيل يوريك اللى ورتهونى ..

- ما تطلعش على الملاية النضيفة و رجليك متوسخة كدة

- حول القناة دى بلاش قلة ادب ومسخرة

- نسيت تشرب ؟ نسيت تاكل ؟ نسيت تقول هاتوا المصروف؟ نسيت تعكنن عليا ؟

- طلع ايدك من جيبك وانت بتكلمنى ..

- يالا يا ابو كحكة حمرا .. انت فاكر نفسك هتاكل معانا؟

- عايزة ابص الاقيك قدامى فوراً ..

- ماتتشقاش فى الفسحة وكُل سندوتشاتك كلها

- آدى اللى انت فالح فيه
و يا رب تنال اعجابكم

هههههههههه تسلم ايديكى
موضوع هايل بجد
فعلا الكلام دا نصه موجود فى البيوت المصرية
تسلم ايديكى بجد

ههههههههههههههههههههههههههههه
تحفه
ايه يابنتي ده طب استري طيب
ماينفعش كده
هههههههههه بس فعلا بيحصل في معظم البيوت المصريه
ميرسي ليكي ياقمر

شكرا اوى على ردودكو االعسوله دى
ومش محتاجين اقولكم نورتو التوبيك
التوبيك توبيكو يعنى