حكاية الحب الاعمي

حكايه من زمان ومن ايام عصر الحجر
حكايه من قبل مايكون في مخلوق من البشر
كانت المزايا والعيوب بيلفوا بملل
بيلفوا وخلاص وفاقدين في الحياه الأمل
وفجأه!!!
الحلم اقترح وقال ماتيجي نلعب
واحد يغمض والكل يقوم يهرب
ويعد من واحد لمائه وبعد كده يقرب
فرح الجنون وقال انا هعد وهو مستغرب

مال على شجره وغمى عينه وابتدا يعد......
قامت المزايا اختفت في غمضه عين
والعيوب مش عارفه تختفي وتروح لفين
والجمال طلع وخبى نفسه عند القمر
والخيانه راحت تختفي بين الشجر
والكدب قال انه مستخبي عند الشجر
واتاريه خبى نفسه تحت الحجر
....ولسه الجنون بيعد ....وقرب خلاص ينتهي
والحب مستني ومالوش مكان ومش عايز يختبي
وبصراحه عنده حق لأن الحب صعب يوم يقدر يختفي
..ولما انتهى الجنون"
رمى الحب نفسه وسط جنينه من الورود
ولقى فيها حبة امل وحبة وعود
..وبدأ الجنون يدور في كل مكان
الكسل اول واحد ظهر وبان
لأنه معملش حاجه ولا راح في اي مكان
والكدب طلع وقال مش قادر اتحمل
مش قادر اتخيل صورتي ومش عايز اكمل
وشاف الجمال باين عند القمر
والخيانه صوت نفسها بين الشجر.
لقاهم الجنون كلهم
ومرضيش يقولهم
انه لما كان بيعد
كان حاسسهم كلهم.

وقعد يدور على الحب
لحد مافقد الأمل انه يلاقيه
وقال اموت بس اعرف
إستخبى فين ابن الإيه
وبسرعه"
ظهر الحسد وقال له....
انا شفت الحب في وسط الورود
وكان معاه احلام وشوية وعود
لازم نموته ونمسحه من الوجود.
استخدم سيف الخيانه يطعن بيها الورود
ظهر الحب حاجب عينيه وقال انا هنا موجود.

صرخ الجنون لما شافه
وكل اللي كانوا حواليه خافوا
ليقوم الحب ينتقم من اللي عملوا الجنون في عينيه
قالهم وشرحلهم اوصافه
وقال مش الحب اللي ينتقم بإيديه
...قرب منه الجنون يطيب خاطره
لما شافه حزين
وكان عايز يكفر ذنبه
وقاله العين بالعين.

نداه الحب وقاله:
لو صحيح عايزني اسامحك
واني يوم انسى جرحك
امسك ايديا وعرفني سكتي
ولو يوم تاهت مني غنوتي
تقوم وتجري تجيبها ليا
وهتبقى معايا في جنتي

ومن يوميها بقى الحب أعمى والجنون بحاله ادرى